போர்டர் – காவஸ்கர் தொடர் தீர்மானம் மிக்க டெஸ்ட் சம்பியன்ஷிப் தொடராகவும் அமைகிறது ; முதலாவது டெஸ்ட் இன்று ஆரம்பம்

கிரிக்கெட் இரசிகர்களால் மிகவும் எதிர்பார்க்கப்பட்ட 5 போட்டிகள் கொண்ட இந்தியாவுக்கும் அவுஸ்திரேலியாவுக்கும் இடையிலான போர்டர் – காவஸ்கர் டெஸ்ட் கிரிக்கெட் தொடர் பேர்த் விளையாட்டரங்கில் நாளை வெள்ளிக்கிழமை (22) ஆரம்பாவுள்ள முதலாவது டெஸ்ட் போட்டியுடன் தொடங்குகிறது.

டெஸ்ட் சம்பியன்ஷிப் தொடரில் முதல் இரண்டு இடங்களில் இருக்கும் இந்த இரண்டு அணிகளும் உலகக் கிண்ண இறுதிப் போட்டிக்கு தகுதிபெறவேண்டும் என்ற குறிக்கோளுடன் விளையாடவுள்ளதால் இத் தொடர் மிகவும் விறுவிறுப்பை தோற்றுவிக்கும் என நம்பப்படுகிறது.

இந்த இரண்டு அணிகளுக்கும் இடையில் அவுஸ்திரேலியாவில் நடைபெற்ற கடந்த இரண்டு போர்டர் – காவஸ்கர் தொடர்களிலும் வெற்றிபெற்ற இந்தியா, மூன்றவாது முறையாகவும் தொடரைக் கைப்பற்ற முயற்சிக்கவுள்ளது. அதேவேளை, தனது சொந்த மண்ணில் இந்தியாவின் வெற்றி அலைக்கு முடிவுகட்டி  தொடரை மீண்டும் கைப்பற்றும் முனைப்பில் அவுஸ்திரேலியா களம் இறங்கவுள்ளது.

இந்தப் போட்டியில் இரண்டு வேகப்பந்துவீச்சாளர்கள் அணித் தலைவர்களாக விளையாடுவது விசேட அம்சமாகும்.

தனது மனைவி இரண்டாவது குழந்தையைப் பெற்றெடுத்துள்ளதால் மனைவிக்கு துணையாக சில நாட்கள் இருக்கவேண்டும் என இந்திய கிரிக்கெட் கட்டுப்பாட்டுச் சபைக்கு ரோஹித் ஷர்மா அறிவித்துள்ளார்.

இதன் காரணமாக முதலாவது டெஸ்ட் போட்டியில் அணியின் உப தலைவர் ஜஸ்ப்ரிட் பும்ராவிடம் தலைமைப் பொறுப்பு வழங்கப்பட்டுள்ளது.

அணித் தலைவர் பதவியைப் பொறுப்பேற்ற பின்னர் ஊடகவியலாளரக்ளிடம் பேசிய பும்ரா,

‘வேகப்பந்துவீச்சாளர்கள் அணித் தலைவர்களாக இருக்கவேண்டும் என நான் எப்போதும் வலியுறுத்திவந்துள்ளேன். அவர்களால் அணியை சிறப்பாக வழிநடத்த முடியும். அணித் தலைவராக பெட் கமின்ஸ் சிறப்பாக செயற்படுகிறார். கடந்த காலங்களில் கபில் தேவ் ஒரு வேகப்பந்துவீச்சாளராக தலைவர் பதவியை சிறப்பாக ஆற்றியிருந்தார். அவர்களது வரிசையில் எனது பயணத்தை நம்பிக்கையுடன் ஆரம்பிக்கவுள்ளேன்’ என்றார்.

இதேவேளை, தலைமைப் பதவி மூலம் கிடைத்த அனுபவங்கள் தன்னை ஒரு சிறந்த வீரராக பரிணமிக்கச் செய்துள்ளதாக அவுஸ்திரேலிய அணித் தலைவர் பெட் கமின்ஸ் தெரிவித்துள்ளார்.

நியூஸிலாந்துக்கு எதிரான 3 போட்டிகள் கொண்ட டெஸ்ட் தொடரில் ரோஹித் ஷர்மா தலைமையில் இந்தியா அதுவும் சொந்த மண்ணில் 0 – 3 என்ற ஆட்டங்கள் வித்தியாசத்தில் தோல்வி அடைந்ததால் அவ்வணி பெரும் பாதிப்பை எதிர்நோக்கியுள்ளது.

தொடர்ந்து 3ஆவது தடவையாக உலக டெஸ்ட் சம்பியன்ஷிப் இறுதிப் போட்டிக்கு தகுதிபெறுவதாக இருந்தால் இந்தத் தொடரில் குறைந்தது 3 போட்டிகளில் இந்தியா வெற்றிபெற்றாகவேண்டும்.

அதேவேளை, நடப்பு உலக டெஸ்ட் சம்பியன் என்ற வகையில் அவுஸ்திரேலியா இறுதிப் போட்டியில் விளையாடுவதற்கான வாய்ப்கை அதிகரித்துக்கொள்ள முயற்சிக்கும்.

ஏனெனில் அவுஸ்திரேலியாவின் கடைசி உலக டெஸ்ட் சம்பயின்ஷிப் தொடர் இலங்கையில் இலங்கைக்கு எதிராக நடைபெறவுள்ளது.

அவுஸ்திரேலியாவும் இந்தியாவும் தங்களுக்கு அடையில் விளையாடியுள்ள 107 டெஸ்ட் போட்டிகளில் 45 – 32 என்ற ஆட்டங்கள் வித்தியாசத்தில் அவுஸ்திரேலியா முன்னிலையில் இருக்கிது. ஒரு போட்டி சமநிலையில் முடிவடைந்தது. மற்றைய போட்டிகள் வெற்றிதோல்வியின்றி முடிவடைந்தன.

குழாம்கள்

இந்தியா: ஜஸ்ப்ரிட் பும்ரா (தலைவர்), அபிமன்யு ஈஸ்வரன், யஷஸ்வி ஜய்ஸ்வால், த்ருவ் ஜுரெல், சர்பராஸ் கான், விராத் கோஹ்லி, தேவ்தத் படிக்கல், ரிஷாப் பான்ட், கே.எல். ராகுல், ஷுப்மான் கில், ரவிச்சந்திரன் அஷ்வின், ரவிந்த்ர ஜடேஜா, நிட்டிஷ் குமார் ரெட்டி, வொஷிங்டன் சுந்தர், ஆகாஷ் தீப், ஹர்ஷித் ரானா, மொஹமத் சிராஜ். ப்ரசித் கிரிஷ்ணா.

அவுஸ்திரேலியா: பெட் கமின்ஸ் (தலைவர்), அலெக்ஸ் கேரி, ட்ரவிஸ் ஹெட், ஜொஷ் இங்லிஸ், உஸ்மான் கவாஜா, மானுஸ் லபுஸ்ஷேன், ஸ்டீவன் ஸ்மித், மிச்செல் மாஷ், நேதன் மெக்ஸ்வீனி, ஸ்கொட் போலண்ட், ஜொஷ் ஹேஸ்ல்வூட், நேதன் லயன், மிச்செல் ஸ்டார்க்.